MWENYEKITI WA TAKUKURU MLOWA NA KESI ZAIDI YA 30

Siku 135 tangu Valentino Mlowola alipoteuliwa kuwa Mkurugenzi Mkuu wa Takukuru tayari ana kesi kubwa zipatazo 30 zinazosubiri uchunguzi zikiwamo zilizoibuliwa na Rais John Magufuli.

Januari 26, Mlowola ambaye alithibitishwa kuwa mtendaji mkuu wa taasisi hiyo Machi mwaka huu alieleza mikakati yake ya kutumbua majipu akianika kesi kubwa zinazoshughulikiwa na taasisi hiyo, zikiwamo zilizokamilika na kupelekwa kwa Mkurugenzi wa Mashtaka (DPP) kwa ajili ya kuombewa kibali cha kuwafikisha mahakamani waliobainika kujihusisha na vitendo vya rushwa.

Alipoulizwa kama Takukuru itaweza kukamilisha uchunguzi wa kesi hizo, mkurugenzi huyo wa zamani wa Intelijensia ya Jinai katika Jeshi la Polisi alisema: “Hatuwezi kuacha kuchunguza kwa sababu ya muda na tunawalipa watumishi wetu kwa sababu ya kazi hii ya uchunguzi. Tuna watumishi wa kutosha ndiyo maana tunachunguza kesi nyingi.”

Baadhi ya kesi kubwa zinazochunguzwa na Takukuru ni ile ya kampuni ya Lugumi inayotuhumiwa kulitapeli Jeshi la Polisi, utakatishaji wa fedha uliotajwa kwenye ripoti ya Panama Papers, tuhuma za rushwa kwa wabunge, madai ya Waziri wa Ardhi, Nyumba na Maendeleo ya Makazi, William Lukuvi kushawishiwa kupewa rushwa.

Nyingine ni sakata la kampuni ya Lake Oil kukwepa kodi ya Sh8.5 bilioni, ununuzi wa mabehewa feki 25 na ukiukwaji wa taratibu za kuwapata wazabuni, matumizi mabaya ya fedha yanayodaiwa kufanywa na Shirika la Taifa la Hifadhi ya Jamii (NSSF) na tuhuma mbalimbali zinazowakabili waliokuwa vigogo wa Mamlaka ya Mapato Tanzania (TRA).

Lugumi

Takukuru inachunguza sakata la kampuni ya Lugumi iliyoingia mkataba wa Sh37 bilioni na Jeshi la Polisi wa kufunga mashine za kielektroniki za kuchukua alama za vidole nchi nzima.

Kampuni hiyo inadaiwa kutotimiza matakwa ya mkataba wake baada ya kufunga mashine 14 tu kati ya 106 ilizotakiwa kufunga, licha ya kulipwa zaidi ya asilimia 90 ya fedha kwa mujibu wa mkataba.

Ripoti ya Mkaguzi na Mdhibiti Mkuu wa Serikali (CAG) ya mwaka 2013/14 ndiyo iliyofichua udhaifu huo.

Ofisa Mtendaji Mkuu wa Wakala wa Usajili wa Biashara na Leseni (Brela), Frank Kanyusi juzi alisema Takukuru inashughulikia suala hilo, huku akibainisha kuwa kwa sasa Brela haina takwimu za kina za kampuni hiyo.

Utakatishaji fedha

Takukuru pia inawachunguza waliohusika na utakatishaji fedha wakati Serikali ilipokopa Dola 550 milioni za Marekani (zaidi ya Sh1.1 trilioni) kutoka Benki ya Standard ya Uingereza.

Tayari watu watatu; Kamishna Mkuu wa zamani wa Mamlaka ya Mapato Tanzania (TRA), Harry Kitilya, pamoja na maofisa wawili waandamizi wa zamani wa Benki ya Stanbic (T), Shose Sinare na Sioi Solomon, wameshafikishwa Mahakama ya Hakimu Mkazi Kisutu, kwa makosa manane likiwamo la kutakatisha fedha.

Takukuru iliwahi kukaririwa ikisema kila aliyetajwa katika sakata hilo kama ilivyoripotiwa na Taasisi ya Makosa Makubwa ya Ufisadi ya Uingereza (SFO), anachunguzwa ili hatua za kisheria zichukuliwe haraka iwezekanavyo, lakini hakutaja majina yao.

Katika hilo la kutakatisha fedha, Takukuru imejitosa kufuatilia ripoti ukwepaji kodi ya Panama Papers ili kubaini kama kuna Watanzania waliohusika.

Kashfa hiyo inayotikisa dunia kwa sasa inahusisha nyaraka zilizoibuliwa na mtandao wa waandishi wa habari ambazo zinawafichua watu maarufu duniani, wakiwamo wakuu wa nchi 12 walioko madarakani na waliostaafu, familia na marafiki zao wa karibu ambao wamenufaika na ukwepaji kodi.

Takukuru ilieleza kuwa Watanzania watakaobainika kutajwa katika ripoti hiyo watachukuliwa hatua kulingana na sheria za nchi.

Matukio mengine

Takukuru pia ilitangaza kuanza kuchunguza taarifa zilizotolewa na Waziri wa Ardhi, Nyumba na Maendeleo ya Makazi, William Lukuvi kuwa alishawishiwa kupokea rushwa ya Sh5bilioni na wafanyabiashara wakubwa huku ikiichunguza kampuni ya Lake Oil inayotuhumiwa kuingiza kwenye soko la ndani lita milioni 17.4 za mafuta yaliyotakiwa kwenda Congo hivyo kukwepa kodi ya Sh8.5bilioni.

Kesi nyingine kubwa inayofuatiliwa na Takukuru ni ile ya ununuzi wa mabehewa 25 ya mitumba uliokiuka Sheria ya Manunuzi ya Umma namba 21/2004 kutoka kampuni ya Hindustha Engineering and Industries Limited. Nyingine ni ile inayomhusu aliyekuwa Mkurugenzi Mkuu wa Shirika Hodhi la Rasilimali za Reli (Rahco), Benhadard Tito baada ya kubaini kwamba kulikuwa na ukiukwaji wa sheria na taratibu za kuwapata wazabuni kwenye mradi wa ujenzi wa reli.

Mtihani mwingine wa Takukuru ni juu ya uchunguzi wa tuhuma za kuomba rushwa zinazowakabili baadhi ya wabunge. Mpaka sasa wabunge takribani 10 wameshahojiwa na taasisi hiyo, akiwamo wa Kigoma Mjini, Zitto Kabwe na wa Nzega Mjini, Hussein Bashe ambao walimuandikia Naibu Spika Job Ndugai, barua za kujiuzulu katika kamati zao ili kupisha uchunguzi huo.

Tayari wabunge kadhaa wameshafikishwa katika Mahakama ya Hakimu Mkazi Kisutu wakikabiliwa na mashtaka ya kuomba rushwa ya Sh30milioni. Hao ni Ahmad Saddiq (Mvomero), Kangi Lugola (Mwibara) na Victor Mwambalaswa (Lupa)

S0urce mwananchi